KHOLETŠHE YA TOKA
Molao wa Tlhatlošo ya Taolo ya Toka
PAJA YA BAETAPELE BA SETŠO
TŠEOSEPHETHO YA TOKA
LE
TŠEOSEPHETHO YA TAOLO
DIPHAPANO
RULAGANTŠWE : 2005
KAROLO YA SEGAE, KHOLETŠHE YA TOKA
THUTO KA GA TŠEOSEPHETHO YA BAETAPELE BA SETŠO
E hlagišitšwe ke Kholetšhe ya Toka le Kgoro ya Toka gammogo le Tlhabollo ya Molaotheo
PHAPANO GARE GA TŠEOSEPHETHO YA TOKA LE TŠEOSEPHETHO YA TAOLO
Baetapele ba Setšo ba diriša bobedi maatla a tšeosephetho a toka le maatla a tšeosephetho a taolo. Go bohlokwa go kwešiša phapano gare ga mehola ye mebedi yekhwi ka gobane molao woo o šomago go bobedi bja tšona o a fapana.
Tšeosephetho ya toka e tšwelela ge Moetapele wa Setšo a bitšwa go tlo ahlolela phapano gare ga maloko a setšhaba goba a šomana le ngongorego ya yo mongwe wa maloko a setšhaba kgahlano le yo mongwe. Ge maloko a mabedi a setšhaba bobedi ba kgolwa gore ba na le tokelo ya phulo malebana le karolo e tee ya naga gomme Moetapele wa Setšo a bitšwa gore a tlo ahlolela gore ke mang wa bona yo a nago le tokelo ya naga yeo, gona seo ke tšeosephetho ya toka ka gobane nepo ya yona ke go rarolla bothata bjokhwi. Ge leloko le itšego la setšhaba le latofatša le lengwe malebana le go utswa dikgogo tša gagwe gomme taba ye ya išwa pele ga Moetapele wa Setšo seo gape se tla ama tirišo ya mohola wa sephetho sa toka.
Ge leloko la setšhaba le dira kgopelo go Moetapele wa Setšo ya tumelelo ya go fudiša diphoofolo tša lona karolong ye itšego ya naga, goba tumelelo ya go aga ntlo lefelong tsoko, gona Moetapele wa Setšo o tla be a diriša mohola wa gagwe wa tšeosephetho ya taolo ge a tšea sephetho sa gore a ka amogela kgopelo yeo. Tšeosephetho ya taolo e laolwa ke karolo ya 33 ya Molaotheo gammogo le ke Molao wa Tlhatlošo ya Taolo ya Toka. Go ya ka dipeelano tša peomolao yekhwi sephetho sefe le sefe goba kgato ya taolo ye e tšewago ke Moetapele wa Setšo e swanetše go ba molaong, e kwagale le gona e lokafale tshepedišong.
Moetapele wa Setšo yo a tšerego sephetho sa taolo goba a tšerego kgato ya taolo o swanetše, ge a kgopelwa, go fa mabaka a a ngwadilwego go yo mongwe le yo mongwe yoo ditokelo tša gagwe di amilwego gampe ke tšeosephetho yeo ya taolo goba kgato. Ge go ganwa ka mabaka gona sehlopha seo se dirilego kgopelo se ka dira kgopelo go kgorotsheko gore e gapeletše gore mabaka a fiwe. Ge mabaka a filwe gomme sehlopha seo se amegilego se kgolwa gore seo ga se molaong, ga se kwale goba tshepedišo ya sona ga se ya lokafala, gona sehlopha seo se ka dira kgopelo go kgorotsheko gore sephetho seo se lekodišišwe lefsa.
Molao woo o amanago le tšeosephetho ya taolo o tšwa go molaokakaretšo, eupša bjale o kopantšwe le Molao wa Tlhatlošo ya Toka ya Taolo. Khopi ya pukwana ye e bitšwago, " A practical Guide to Administrative Justice'/ Tšhupatsela ya Tirišo go Toka ya Taolo', e tla fiwa bakgathatema ka moka mo thutong yekhwi. Pukwana ye e fa tlhahlo kgato ka kgato mabapi le tšeosephetho ya taolo, kgato ya mathomo e lego tsinkelo ya motheo woo go wona motho a matlafaditšwego go tšea sephetho goba go tšea kgato …
Ge go tšewa diphetho tša toka, Baetapele ba Setšo ba swanetše go obamela Molaotheo, ditheo tša molaokakaretšo tše di amanago le tšeosephetho ya toka le dipeakanyetšo tša peomolao efe le efe yeo e matlafatšago. Bogolo bja tabasererwa yeo go šomanwago ka yona mo thutong yekhwi, bo amana le tšeosephetho ya toka. Diphetho tša toka di ka tšewa le boipiletšong goba phegišanong.
